- Liggur sum ein skammblettur

Tað var 5. apríl í fjør at fóðurflakin Hellutangi sleit í illveðri og rak á land á Víkum.

Royndir vórðu gjørdar at fáa hann av aftur, men hetta eydnaðist ikki. Fyrst í august varð avgerð tikin um, at gevast við royndunum fyri veturin.

Føroya Náttúru- og Umhvørvisfelag (FNU) hevur aftur og aftur gjørt vart við, at alivirksemi ikki skuldi vera á økinum, og harmast eisini nú felagið hevur fingið myndir sendandi av Hellutanga.

Á myndunum sæst, at fóðurflakin er tægaður sundur av brimi, og at leivdirnar av vrakinum liggja spjaddar í hesum náttúruvakra øki. Vraklutirnir síggjast væl, tí har er rættiliga grunt. 

- Hetta er eingin vøkur sjón og avgjørt ein skammblettur á hesa annars órørdu náttúru, sigur FNU í lesarabrævi á lesarin.fo.

- FNU harmast um, at myndugleikar og privata vinnulívið – hóast greiðar ávaringar – fara so óvandaliga fram móti okkara felags náttúru. Serliga átaluvert er tað, tá talan er um eitt so sjáldsamt náttúruøkið, sum hetta vesturi á Víkum.

- Samfelagnum tørvar vinnulív og fyritakssemi, men FNU fer enn einaferð staðiliga at heita á myndugleikarnar og alifyritøkur um at vísa størri fyrilit fyri náttúruni, tá vinnuligar útbyggingar verða gjørdar. 

Myndirnar tók Jóna A. Ólavsdóttir skírisdag 14. apríl 2022.