Donsk skip góðan fiskiskap eftir svartkjafti

Donsku skipini hava seinastu tíðina fiskað svartkjaft vestanfyri Írland.

Fyrr í vikuni landaði stóra danska uppsjóvarskipið Ruth, sum føroyingurin Gullak Madsen eigur, eina svartkjaftalast í Skagen.

Teir hava landað 3000 tons av svartkjafti til virkið FF Skagen, og fiskiskapurin hendan túrin hevur verið góður.

Asbjørn, sum familjan Magnussen í Hirtshals eigur, hevur somuleiðis landað svartkjaft í vikuni, men hvat nøgdin hjá teimum var, vita vit ikki.

Tá ið Ruth hevði landað, slapp Gitte Henning, sum er størsta fiskiskipið í danska flotanum, framat.

Gitte Henning hevði 3200 tons av svartkjafti, sum eisini teir hava fiskað vestanfyri Írland.

Tá ið Gitte Henning hevur landað, fara teir at fiska nebbasild.