Góð tænasta í Føroyum

Í dag lá stóra frálandavinnuskipið Deep Energy á Havnini. Skipið er bygt í 2013, er 194,5 metrar langt, 31 metrar breitt og er skrásett á Bahamas. Tað er serbygt og er eitt “Pipe Layer” (rørleggjara skip), sum oftast arbeiðir í sambandi við oljurørleiðingar á havbotninum.

Sjómanstrúboðarin vitjaði umborð í dag. Har hitti hann Benjo Mahilum Pairat, sum sat vakt inn frá landgongdini. Uppá fyrispurning hvat teir gjørdu á Havnini, svaraði hann.

- Vit arbeiða í bretskum øki stutt frá føroyska markinum. Nú veðrið gjørdist vánaligt og skipið skuldi skifta manning, komu vit á Havnina. Tað er styttri at sigla til Føroyar enn til Skotlands, og so er sambandið til og úr Føroyum gott.

- Hvussu nógv fólk eru við?

- Vit eru 134 fólk umborð. Vit koma frá londum sum Stóra Bretlandi, Írlandi, Póllandi og Filipsoyggjunum, segði hann.

- Hvussu er tænastan tit fáa í Føroyum?

- Hon er góð. Tí komu vit aftur her. Bussar avheinta fólk og koma við fólkið, og so er frítt netsamband á havnarlagnum. Tað kemur væl við, serliga hjá teimum, sum hava familju hinumegin jørðina, segði Benjo Mahilum Pairat.

Manningin fekk ymiskt bíbilskt tilfar á enskum, polskum og á filipinskum.

Teimum og sjófólkinum annars verður ynskt Guds signing og varðveitslu.