Lítla vónin minkar og sorgin tekur meira yvir

- Tíðliga týsmorgunin sendi Kambur út neyðarkall og sakk fáar tímar seinri. 14 mans blivu bjargaðir, men tíverri eru tveir saknaðir. Tað eru tveir av okkara limum, sum ikki eru komnir afturíaftur, og okkara tankar leita til teirra næstu, sum við stórari sorg sita og bíða við einari lítlari vón.

Tað skrivar Jan Højgaard, formaður í Føroya Fiskimannafelag á heimasíðu felagsins.

- Vit vóna saman við teimum, men sum tímar og dagar renna, so minkar lítla vónin, og sorgin tekur meira yvir. Okkara tankar eru eisini hjá teimum, sum blivu bjargaðir. Teir hava verið úti fyri einari sera óhugnaligari hending, og teir sálarligu løstir, teir hava fingið, fara at ávirka teir allar dagar, skrivar Jan Højgaard.

- Góðu tit øll – manning á Kambi, reiðarí og avvarðandi: okkara tankar eru hjá tykkum í hesi sváru tíð, skrivar Jan Højgaard, formaður í Fiskimannafelagnum.

Jan Højgaard (Savnsmynd: Jens Kr. Vang)