Útflutt fyri 10,2 milliardir higartil í ár

Tíðarskeiðið januar til oktober 2022 hava vit í Føroyum útflutt fyri 10,2 milliardir krónur. Tað er 29 prosent meira enn sama tíðarskeið í fjør, har útflutt varð fyri 7,9 milliardir krónur.

Fiskavøruútflutningurin í sama tíðarskeiði var 9,3 milliardir krónur, ið er 28 prosent meira enn sama tíðarskeið í fjør, tá vit útfluttu fiskavørur fyri 7,3 milliardir krónur.

Útflutningsvirðið er vaksið fyri øll fiskasløg. Útflutningsvirðið av fiskavørum fyrstu 10 mánaðirnar av 2022 er nú farið upp um fiskavøruútflutningin fyri alt árið 2021, sum var metár, skrivar Hagstovan.

Vøksturin stavar frá prísvøkstri, tí útflutta nøgdin minkaði við fýra prosent.

Laksaútflutningurin er vaksin úr 3,5 milliardum krónum upp í 4,5 milliardir krónur - ella 30 prosent. Hetta hóast útflutta nøgdin minkaði átta prosent.

Útflutningsvirðið fyri botnfiskasløgini tosk, upsa og hýsu er vaksið 422 milliónir krónur - ella 40 prosent – meðan nøgdin er vaksin seks prosent.