Bakkafrost Farming ætlar at byggja nýggja smoltstøð á Norðtoftum

Bakkafrost Farming hevur ætlanir um at byggja nýggja smoltstøð á Norðtoftum. Í hesum sambandi skal ein útfylling á sjógv gerast. Talan er um at fylla út vestur úr økinum har smoltstøðin er, einar 220 metrar og upp til 40 metrar út frá verandi sjóvarmála, út á fimm metra dýpi. 

Grótið skal fáast til vega við at spreingja eitt øki inn í lendið oman fyri har útfyllingin skal vera. Haðani fæst umleið 25.000 m³ av gróti í føstum máti. Eisini skal grót fáast til vega við at víðka grótbroti í Depli, her er talan um umleið 32.500 m³ í føstum máti, skrivar Umhvørvisstovan.

Tilsaman verða upp til 7.500 m² av botni lagdir undir grótfyllu. Samlaða víddin á økinum verður umleið 14.700 m².

Í umhvørvisgóðkenningini setur Umhvørvisstovan treytir til, hvussu arbeiðið skal fara fram og serliga við atliti at mannagongdum til at fyribyrgja, at spreingileidningar enda úti í náttúruni.