![placeholder](https://fiskur.fo/css/img/banner2x1.png)
Dennis Holm, landsstýrismaður í fiskivinnumálum, hevur sent uppskot um broyting í kunngerðini um landing í Føroyum til ummælis.
Broytingin er, at makrelur, veiddur í norskum sjógvi, verður undantikin kravinum um landing um føroyskan bryggjukant.
Tá Føroyar, Bretland og Noreg nýliga skrivaðu undir semju um at skipa fiskiskapin eftir makreli í 2024, avtalaðu Føroyar og Noreg samstundis, at føroysk skip kunnu fiska ein part av føroysku makrelkvotuni í norskum sjógvi.
Í avtaluni við Noreg er treyt, at allur makrelur, sum føroysk skip fiska í norskum sjógvi, skal seljast gjøgnum ella við góðkenning frá Norges Sildesalgslag. Hendan treytin ger, at makrelur, sum føroysk skip fiska í norskum sjógvi, kann verða avreiddur aðrastaðni enn í Føroyum.
Sambært sjófeingislógini skal veiða hjá føroyskum fiskiførum landast og avreiðast um bryggjukant í Føroyum; tó kunnu í mesta lagi 15 prosent av veiðuni fyri hvørt fiskaslag sær landast og avreiðast uttanlands. Heimild er at gera undantak frá hesum kravi.
Í kunngerð um landing í Føroyum eru ávís fiskasløg undantikin kravinum um at verða landað í Føroyum.
Fyri at avtalan við Noreg um atgongd at fiska makrel í norskum sjógvi í 2024 skal kunna setast í verk, er neyðugt at broyta kunngerðina, so at eisini makrelur úr norskum sjógvi kemur á listan við fiskasløgum, sum eru undantikin kravinum um landing í Føroyum.
Uppskotið um broytingar í kunngerðini um landing í Føroyum er til ummælis fram til 16. juli 2024.
Fiskivinnu- og samferðslumálaráðið
Vinarliga broyt tínar kennifíla - og privatlívsstillingar fyri at síggja hetta innihald