Danskt uppsjóvarskip á Havnini á jólum

Isafold er størsta danska uppsjóvarskipið, og hevur júst landað makrel í Fuglafirði.

Danska uppsjóvarskipið hevur verið á makrelveiðu í hetlendskum sjógvi, og hevur landað 1.500 tons av makreli til Pelagos.

Tá ið liðugt var at landa, varð avgjørt at koma á Havnina við skipinum, har tað verður liggjandi til 1. januar tá ið skipið aftur fer á makrelveiðu.

Við Isafold sigla fleiri føroyingar.

Isafold er bygt Spania, og kom í danska flotan í november í fjør. Skipið hevur riggað væl.

Tað var danski stórreiðarin Henning Kjeldsen, í Skagen, sum upprunaliga lat skipið sniðgeva hjá Salt Ship design í Noregi, eftir at hann hevði selt undan farnu Gitte Henning til Føroya. Hetta skipið eitur í dag Gøtunes.

Men áðrenn Henning Kjeldsen yvirtók nýbygningin, sum hann lat byggja í Skagen, seldi hann meginpartin av teimum pelagisku kvotunum og nýgbygning, sum var í ger í Spania.

Trý reiðarí keyptu kvoturnar hjá Henning Kjeldsen, og eitt av teimum var reiðaríið Isafold AS, í Hirtshals, sum samstundis yvirtók nýbygningin, sum skuldi avloysa eitt eldri uppsjóvarskip við sama navni.