Fara at kanna fóðurflakan í næstu viku

Í næstu viku verður Hellutangi, fóðurflakin hjá alifelagnum Luna, kannaður. Veðrið sær út til at blíva betri týsdagin ella mikudagin, og tá skal kannast hvørjum standi skipið er í.

Tað sigur Atli Gregersen, stjóri, við útvarpið.

Fóðurflakin sum hevur ligið fortoyðaður á Víkum sleit stutt fyri midnátt mánakvøldið, og rak inn á sandin, har hann enn liggur.

Enn vita tey á Luna ikki hvørjum standi flakin er í, tí eingin hevur verið umborð enn. Men tað verður helst greitt tá tað viðrar í næstu viku.

Felagið fekk fóðurflakan Hellutanga í apríl 2019. Hellutangi er 78 metrar langur, og lastar 1.000 tons av alifóðri.