Gadus farin til fiskiskap

Klokkan fimm í gjár loysti Gadus, nýggjasta skipið í føroyska flotanum, frá Norðhavnini í Klaksvík.

Komnir út í Kalsoyarfjørð var andakt umborð. Skiparin Ólavur Biskopstø byrjaði við bøn og Torleif Johannesen, sjómanstrúboðari hevði bíbliuorðið, bøn og signingina. Uppmøtingin til andaktina var góð og sangurin rungaði í salongini við klaver- og fiól fylgispælið.

Eftir at vitjandi til andaktina vóru sigldir aftur til lands við mobbátinum, hevði manningin bjargingarroynd umborð. Síðani var kósin sett eystur í hav.

Ætlanin er at royna nakrar dagar í norskum sjógvi, har teknikarar og annað fólk eru umborð, fyri at royna útgerðina. Vónandi riggar fiskiútgerðin, og skipið, annars væl, so teir kunnu fara í Barentshavið at royna. Nevnast kann, at jólapakkar frá sjómanskvinnuringunum eru umborð.

Teimum verður heilsað við gomlu føroysku heilsanini:

“Góðan túr og Jesus fylgi tykkum”!