Høvdu roykkavaravenjing á Varðanum Pelagic

Um tann ólukkuliga støðan skuldi íkomið, so eru tey fyrireikaði á Varðanum Pelagic. 

Tekniska toymið á Varðanum Pelagic hevur, umframt sínar dagligu uppgávur, ta týdningarmiklu uppgávu at vera hjálpi-roykkavarar. Hetta merkir, at teir hava teoretiskar og praktiskar førleikar innan roykkaving og eldsløkking við fullari sløkkiliðsútgerð á stóra virkinum hjá Varðanum Pelagic. 

Hjálpi-roykkavararnir kunnu vera lokala sløkkiliðnum til hjálpar í tí ólukkuligu støðu, at eldur kyknar á virkinum. Teknikararnir hava tann fyrimunin, at teir kenna hvønn krók á virkinum og kunnu tí virka sum týdningarmiklir vegvísarar í einum roykfyltum virki.

Í síðstu viku var árliga venjingin og uppfrískingin av hesum teoretisku og praktisku førleikunum á skránni. Lærlingar, sum leggjast afturat tekniska toyminum, verða eisini útbúnir sum hjálpi-roykkavarar á Varðanum Pelagic. 

Jákup Haraldsen, tilbúgvingarleiðari á Vága Floghavn, undirvísti í venjingini og letur sera væl at okkara dugnaligu hjálpi-roykkavarum, verður sagt.