Niðurgongd í øllum trimum uppsjóvarstovnunum

Úrslitini frá felags kanningunum av uppsjóvarfiski í eystara parti av Norðuratlantshavi í summar vísa eina niðurgongd í øllum trimum uppsjóvarstovnunum, makreli, sild og svartkjafti. Tað vísa nýggjastu kanningarnar hjá Havstovuni.

Vísitalið fyri makrel var 6,2 milliónir tons í ár, sum er ein lækking á 40% í mun til í fjør og 30% lægri enn miðal seinastu fimm árini. Tað var serliga í grønlendskum øki, at minkingin var stór, men eisini í íslendskum øki var ein lutfalsliga stór minking, meðan minni munur var í eystara parti av kanningarøkinum.

(Mynd: Útbreiðsla og nøgd (kg) av makreli í yvirlitstrolingini summarið 2018)

Fyri norðhavssild lækkaði vísitalið við 24% í 2018, niður í 4,5 milliónir tons. Útbreiðslan av sild var eins og undanfarin ár. Mest var at síggja í økjunum í ein útnyrðing úr Føroyum og eystan og norðan fyri Ísland.

 (Mynd: Útbreiðsla og nøgd (ekkóvirðir) av norðhavssild summarið 2018)

Nøgdin av svartkjafti hevur verið kannað síðani 2016 í hesum kanningunum. Vísitalið fyri svartkjaft var 2 milliónir tons, sum er 11% lægri enn í 2017. Svartkjaftur var at síggja so at siga í øllum kanningarøkinum, burtursæð frá økjunum við køldum sjógvi í Eysturgrønlandi og norðan fyri Ísland.

  (Mynd: Útbreiðsla og nøgd (ekkóvirðir) av svartkjafti summarið 2018)

Kanningin er skipað sum altjóða felags kanning undir ICES, har Føroyar luttaka saman við Noregi, Íslandi, Danmark og Grønlandi. Tróndur í Gøtu var leigaður til føroysku kanningarnar.

Les alla frágreiðingina her.