Norðmenn hava brúkiligan fiskiskap við Føroyar

- Norska kvotan við Føroyar er felagskvota og 12 skip kunnu fiska í senn. Verður kvotan uppi, noyðast øll skipini at gevast. Vit royna mest á djúpum vatni eftir longu og brosmu og fiskiskapurin er brúkiligur.

Mánadagin lógu stóru norsku frystilínuskipini Geir og Østerfjord á Havnini. Tey fiska við Føroyar og vóru inni og skiftu manning, tóku agn, proviant og annað.

Geir, sum hoyrir heima í Ålesund, er sera væl útgjørt og nýmótans, og er óivað størsta frystilínuskip í heiminum – tá tosa verður um skip, sum bara roynir við línu. Østerfjord og Atlantic eru størri, men tey fiskað eisini við snurriváð.

Sjómanstrúboðarin vitjaði umborð á Geir og fekk eitt prát við skiparan, Hallgeir Holmeset. Hann er ein av trimum beiggjum, sum eiga og reka skipið. Hallgeir segði millum annað.

- Skipið er fýra ára gamalt. Tað er 63 metrar langt og 13,5 metrar breitt og lastar 500 tons á plattum. Breiddin er gjørd soleiðis, at vit fáa 11 plattar eftir breiddini í lastina. Vit hava rundan dragibrunn, sum er 1,5 metrar í tvørmát.

- Vit eru millum 15 og 18 mans við. Talið er tengt at hvar vit fiska og hvussu nógv vit skulu hagreiða fiskin. Vit hava flakalinju og nýta hana tá vit halda tað gevur mest. Harafturat hava vit frystihotell, har frysti fiskurin fer á plattar, verður vavdur inn í plast, verður eyðmerktur, áðrenn hann fer niður í lastina og verður settur uppá pláss við trukki. Tað gongur skjótt at landa, tí vit klára 50 tons um tíman, sigur hann.

(Mynd: Sjómansmissiónin)

Uppá fyrispurning hvar teir fiska, segði Hallgeir.

- Eg kann siga, at vit fiska frá russiskum øki í eystri og heilt vestur á Flemish Cap. Á Flemish Cap fáa vit bara ein túr hvørt tíggjunda ár, tí kvoturnar verða býttar millum nógv skip, sigur hann.

- Vit fiska mest í norskum sjógvi. Vit fiska eisini av og á við Ísland og Eysturgrønland og hvørt ár við Føroyar. Sum oftast gera vit ein túr við Føroyar um árið, sum tekur fimm vikur. Í ár koma vit at gera tveir. Vit landa ikki millum túrarnar, men skifta fólk tá fimm vikur eru farnar, og tí eru vit nú inni á Tórshavn, sigur Hallgeir.

- Norska kvotan við Føroyar er felagskvota og 12 skip kunnu fiska í senn. Verður kvotan uppi, noyðast øll skipini at gevast. Vit royna mest á djúpum vatni eftir longu og brosmu og fiskiskapurin er brúkiligur, sigur Hallgeir Holmeset.

Frá sjómanstrúboðaranum fingu teir kristiligan lesnað og gomlu føroysku heilsanina.

Góðan túr og Jesus fylgi tykkum!

Føroyska Sjómansmissiónin ynskir teimum og sjófólkinum annars Guds signing og varðveitslu.