Toskurin hevur allatíðina verið á bankanum

Toskurin, sum nú fæst í størri mongdum á Føroyabanka, er ikki komin úttanífrá.

Hetta er niðurstøðan í eini frágreiðing, sum Havstovan kunngerð í dag. Spurningur hevur verið settur hvaðani toskurin mann vera komin, nú tað knappliga aftur er nógvur toskur at fáa eftir at økið hevur verið stongt fyri vinnuligari veiðu frá 2008 og 12 ár fram.

Niðurstøðan hjá fiskifrøðingunum á Havstovuni er, at toskurin alla tíðina hevur verið á Føroyabanka.

Henda niðurstøða er gjørd millum annað út frá, at tað ongantíð er hent, at ein merktur toskur av landgrunninum er fingin á Føroyabanka, og tað undirbyggir niðurstøðuna um, at toskurin sostatt ikki flytir millum landgrunnin og bankan.

Ein annar spurningur er, hvussu tað ber til, at skip og bátar næstan ongan tosk fáast tá roynt verður á Føroyabanka.

Havstovan greiður frá, at toskurin á bankanum er eitt serligt og øðrvísi slag enn tann toskur, sum livir á føroyska landgrunninum.

Veksur nógv skjótari

Ein stórur munur millum sløgini er tann, at bankatoskurin veksur nógv skjótari enn landgrunstoskurin. Ein toskur á Føroyabanka er longu 80 sentimetrar langur í miðal og vigar 8 kilo tá hann er fýra ára gamal. Á landgrunninum er tann fýra ára gamli toskurin í miðal 60 sentimetrar og vigar 2,3 kilo, skrivar Havstovan.

Tað er vanlig vitan, at toskayngul verður etið av øðrum fiskum, eisini toski. Á landgrunninum hevur ungi toskurin taraskóg at fjala seg í, men henda møguleikan hevur bankatoskurin ikki.

Hetta kann vera orsøkin, at tað á Føroyabanka er framkomin eitt egið toskaslag, sum veksur nógv skjótari tey fyrstu árini, enn onnur sløg av toski gera.

Regluligar yvirlitstrolingar

Rannsóknarskipini hjá Havstovuni hava í nógv ár gjørt regluligar yvirlitstrolingar á vári og heysti á Føroyabanka. Í 2004 varð staðfest, at nøgdin, ið fingin varð á bankanum var sera lítil, og í 2008 vóru politisk stig tikin til at friða Føroyabanka fyri at bjarga toskastovnin har.

Á yvirlitstrolingunum síðan hevur stórur toskur verið at fáa, men í lítlum tali. Ikki fyrr enn fyri fýra árum vóru nøgdir at fáa, sum líktist teimum frá áðrenn 2004.

Í 2021 varð bankin so latin uppaftur fyri avmarkaðari vinnuligari veiðu.

Meira er at lesa og síggja á heimasíðuni hjá Havstovuni 

Kokkarnir fagna bankatoskinum

Føroyskir kokkar, matkennarar og matelskarar hava í fleiri ár fagnað toskinum av Føroyabanka sum nakað heilt serligt, eisini tá tað kemur til smakk og eginleikar, og á hvørjum ári hava matstovurnar í Gongini í Havn og stundum eisini aðrar, skipað fyri serligum bankakvøldum í samband við at matstovurnar hava keypt burtur av veiðuni, tá Magnus Heinason og nú Jákup Sverri hava verið úti á sínum regluligu yvirlitstrolingum.

Herundir nakrar myndir úr myndagoymsluni: