Bakkanes klassað hjá Mest

Tað var í juni 2021, at Bakkanes, hjá Bakkafrosti, kom til landið. Eftir at verða umbygt, hjá Mest á Skála, til tænastuskip í alivinnuni, fór tað á heystið 2021 til Skotlands, har tað síðani hevur arbeitt í alivinnuni hjá Bakkafrosti. Síðstu vikurnar hevur skipið ligið aftur hjá Mest á Skála, har ymiskt viðlíkahald er gjørt.

- Vit eru í Føroyum við Bakkanesi, tí skipið skuldi klassast. Samstundis er ymiskt viðlíkahald gjørt og onkrar smávegis broytingar, so skipið verður uppaftur betri egnað til arbeiðið, sigur skiparin John Elias Jacobsen.

(Mynd: Torleif Johannesen / Sjómansmissiónin)

- Bakkanes veitir ymiskar tænastir til alivinnuna, so sum at sigla við nótum, sleipa ringar og flakar og so avlúsa vit eisini. Um næturnar liggja vit ofta uppankraðir, tí havnirnar í Vesturskotlandi eru smáar, og so er stórur munur á flóð og fjøru. Tá er tað høgligari at liggja uppankraðir, sigur hann.

- Vit vóna at vera klárir at fara aftur til Skotlands um eina góða viku. Vit eru 9 mans umborð í senn og tvær manningar hoyra til skipið. Vit eru umborð í 5 vikur og hava so frí í 5 vikur, og eg haldi menn dáma tað væl, sigur John Elias Jacobsen.

Sjómanstrúboðarin vitjaði umborð á Skála og heilsaði uppá manningina.

Tíð var eisini til drekkamunn, prát, Guds orð og bøn.

Teimum umborð á Bakkanesi, og sjófólkinum annars, verður ynskt Guds signing og varðveitslu.