Brimil botnviðgjørdur á Mest

Seinastu tíðina hevur vaktar- og bjargingarskipið Brimil verið á beding hjá Mest í Havn, og fingið millum annað fullfíggjaða botnviðgerð.

Mest skrivar á heimasíðuni, at hetta arbeuðið sum fevnir um femm løg av máling, tekur eina til tvær vikur.

Fyrst var dýbdar vasking av gomlu málingini gjørd við 3000 bar trýsti, so at vaska væl og virðiliga heilt inn á stálið. Á tann hátt fæst ein sløtt yvirflata. Síðani varð byrjað við yvirflatuviðgerð av nýggjum, við tveimum løgum av grundara og einum sambindingarlagi millum grundmáling og botnmálingina. Til síðst var málað við tveimum løgum av botnmáling.

- Henda heildarbotnviðgerðin leingir um slitstyrki og livitíð – og skipið kennist sum eitt nýtt skip aftaná hesa viðgerð. Úrslitið er samstundis ein slætt flata á botninum, sum tryggjar minni mótstøðu í sjónum og harvið betri lønsemi, skrivar Mest.

Ein yvirháling er eisini gjørd av bógskrúvuni.

Brimil fer væntandi í sigling aftur seinni í vikuni.