Fleiri sildalandingar í Danmark

Fleiri av uppsjóvarskipunum taka av møguleikanum at fara uttanlands at landa, nú skipini hava fingið loyvið at landa sild uttanlands.

Eitt av støðunum, har uppsjóvarskip fara at landa sild er í Skagen, í Danmark.

Gamli Jupiter landar í dag 1.300 tons av sild til FF Skagen í Skagen, og Ango er ávegis til Skagen við umleið 1.200 tonsum.

Umframt Ango, so er uppsjóvarskipið Hoyvík eisini ávegis til Danmarkar, har skipið skal landa umleið 1.000 tons.

Hoyvík hevur partrolað við Ran hendan túrin.

Fiskiskapurin eftir sild hevur verið góður seinastu dagarnar, og støddin á sildini er góð.

Uppsjóvarskipið Birita er ávegis til Noregs at landa beint undir 1.000 tons av sild. Birita hevur nú fiskað sildakvotuna fyri í ár, og fer helst á svartkjaftaveiðu tá ið liðugt er at landa í Noregi.