Flestu skipini bíða til fiskiskapurin eftir makreli tekur seg upp

Nøkur uppsjóvarskip hava seinastu dagarnar fiskað makrel, men hann er ov bleytur enn, og tí eru flestu skipini givin við fiskiskapinum til makrelurin verður feitari.

Á Runavík liggur flotin hjá Varðanum Tróndur í Gøtu, Gøtunes, Tummas T og Finnur Fríði.

Á Skála er Fagraberg í dokk, og í Fuglafirði liggur Høgaberg, meðan Norðingur og Birita eru á Klaksvík, og Borgarin og Christian í Grótinum liggja á Ánunum.

Við Mest í Havn liggja skipini Ango og Arctic Voyager, meðan Hoyvík stendur uppi á bedingini.

Í Vestmanna liggja uppsjóvarskipini Vestmenningur og Fram, meðan Katrin Jóhanna er í Skagen, har skipið verður málað, og annað viðlíkahaldsarbeiðið verður gjørt. 

Einastu uppsjóvarskipini, sum eru til fiskiskap í løtuni er Norðborg, sum er á feltinum eystanfyri fyri Føroyar, og Jupiter, sum er á ávegis til Thyborøn við 2210 tonsum av svartkjafti, sum teir hava fiskað í føroyskum sjógvi. 

Tá ið Jupiter hevur landað, verður farið aftur á svartkjaftaveiðu í føroyskum sjógvi.