Føroya Reiðarafelag svarar aftur: - Kenna einki til, at skipini ikki halda galdandi sáttmálar

Føroya Fiskimannafelag avgjørdi hósdagin 25. oktober 2018 at kunngera ein "svartalista" við tveimum skipum, sum verða søgd ikki at halda galdandi sáttmála við felagið - og skipini, ið nevnd vórðu, eru Arctic Voyager og Hoyvík.

Men nú svarar Føroya Reiðarafelag aftur í fráboðan, at reiðarafelagið einki kennir til, at nevndu skipini ikki halda galdandi sáttmálar.

- Gerast skal vart við, at tey skip, sum eru nevnd á hesum lista, eru limir í Føroya Reiðarafelag, og at tey halda galdandi sáttmála millum Reiðarafelagið og Fiskimannafelagið. Reiðarafelagið er sostatt ikki kunnugt við, at sáttmálin ikki verður hildin, sigur Føroya Reiðarafelag í fráboðanini.