Gulllaksafiskiskapurin byrjaður

Seinastu árini hava trý pør fiskað føroysku gulllaksakvotuna, og í ár er einki undantak.

Talan er um pørini Polarhav og Stjørnuna, Eysturbúgvan og Vesturbúgvan umframt Skoraberg og Fuglberg.

Fyrsta parið, Polarhav og Stjørnan, er longu byrjað at fiska gulllaks, meðan hini bæði rigga til.

Kvotan er hækka við 6.000 tonsum í 2022

Í 2021 var føroyska gulllaksakvotan 12.000 tons, men í ár er hon hækka við 6.000 tonsum, so hon í ár er 18.000 tons.

Pørini Polarhav og Stjørnan og Skoraberg og Fuglberg hoyra til Kósina í Klaksvík, har skipini eisini landa fast, og síðan verður gulllaksurin koyrdur í bilum til Tavuna í Leirvík, har gulllaksurin verður framleiddur. Tó verður ein partur av gulllaksinum landaður í Kollafirði hjá Faroe Pelagic.

Eysturbúgvin og Vesturbúgvin plaga sum oftast at landa gulllaksin á Toftum. Teirra veiða verður eisini koyrd í bilum til Tavuna í Leirvík.

Vesturbúgvin og aftanfyri liggur Eysturbúgvin (Savnsmynd: Kiran Jóanesarson)

Skoraberg (Savnsmynd: Kiran Jóanesarson)

Fuglberg (Savnsmynd: Føroyska Sjómansmissiónin)