Høgaberg verður handaður nýggju eigarunum í vikuni

Uppsjóvarskipið Høgaberg kom til Norra tíðliga í morgun, og skipið verður handað nýggju eigarunum í vikuni.

Leiðin gekk fyrst til Søviksnest, har útgerð skuldi leggjast í land, og síðan varð siglt til Måløy, har skipið skuldi í dokk.

Hetta verður gjørt, soleiðis at nýggju eigararnir kunnu síggja botnin og annað, áðrenn sølan endaliga verður avgreidd, og hetta er ein heilt vanlig mannagongd í sambandi við skipakeyp.

Greitt er eisini at skipið skal málast grønt, men tað verður tó ikki fyrr enn tíðliga í summar, og skipið fer at fáa navnið Andrea L, sum er navnið á aðrari dóttrini hjá nýggja eigaranum.

Framherji skal í eitt gott ár brúka Gamla Jupiter at fiska kvoturnar hjá Høgabergi, inntil reiðaríið fær handað ein nýbygning úr Skagen.

Gamli Jupiter kom á Fuglafjørð fyrrapartin, eftir at skipið er málað og annað á Skála Skipasmiðju.

Tá ið Framherji fær handað nýggja Høgaberg, fer Gamli Jupiter aftur til undanfarnu eigararnar í Kollafirði.

Gamli Jupiter skiftir tó hvørki heimstað ella navn í sambandi við at Framherji skal brúka skipið sum skiftisskip.