Innanlands

Varðin Pelagic verður tikið alment í nýtslu í morgin

Bygningurin er næstan liðugur allur sum hann er. Eldur herjaði á virkinum summarið 2017

2019-01-24 15:41 Author image
Ari av Rana

Stórur eldur herjaði á virkinum hjá Varðanum Pelagic á Tvøroyri tann 8. juni 2017. Eldurin tók allan bygningin og alt kolaðist upp.

Avgjørt varð at byggja bygningin upp aftur og nú er so langt komið á mál, at Varðin Pelagic bjóðar starvsfólki, myndugleikum, fólki frá politisku skipanini o.s.fr. inn til móttøku í morgin

- Vit hava valt at bjóða nøkrum inn í morgin at síggja bygningin. Alt er ikki komið uppá pláss, men nóg nógv til at hesi kunnu koma inn, sigur Bogi Jacobsen, stjóri á Varðanum Pelagic.

Bogi Jacobsen sigur, at talan er um eini 300 fólk, sum koma inn at síggja virkið í morgin.

Hóast virkið ikki hevur verið heilt liðugt, so hevur verið framleitt síðani í september, og skip hava landa og avreitt. Framleiðslurúmini vórðu gjørd fyrst, so at framleiðast kundi og virkið framleiddi 60.000 tons í fjør.

Bogi Jacobsen sigur, at hann væntar at almenn móttøka verður á Varðanum Pelagic um einar tvær vikur.