Innanlands

Komu undir land áðrenn stormurin kom

Vit fóru at sigla inn undir land, áðrenn nógvi vindurin og høgu aldurnar komu, tí aftaná er trupult at sigla, sigur skiparin á Brestir

Birgir Hansen, skiparin á Brestir (Mynd: Føroyska Sjómansmissiónin)

Birgir Hansen, skiparin á Brestir (Mynd: Føroyska Sjómansmissiónin)

2023-02-20 21:29 Author image
Føroyska Sjómansmissiónin
placeholder

Eitt av fiskiskipunum, sum kom undir land at kroka, nú stormurin aftur ýldi um oyggjarnar sunnukvøldið og til middags í dag, er frystitrolarin Brestir. Hann royndi eftir svartkalva eystur úr Fugloyarbankanum.

- Vit fóru at sigla inn undir land, áðrenn nógvi vindurin og høgu aldurnar komu, tí aftaná er trupult at sigla. Veðurmenninir lovaðu upp í kolandi storm og 12-14 metur høgar aldur, sigur skiparin á Brestir, Birgir Hansen. 

- Tá vit kortini lógu undir landið, sigldu vit inn á Runavík, har okkurt smávegis skuldi gerast við scanmar trolútgerðina. Samstundis bunkra vit, so vit kunnu vera úti í fýra vikur, tá vit nú fara avstað aftur seinni í dag, sigur hann.

- Ymiskt viðlíkahald er gjørt við skipið, so hetta er okkara fyrsti túrur í ár. Vit hava roynt í fimm dagar og fiskiskapurin var í lagið. Tí var tað spella, at noyðast at ríma av fiskileiðini, men soleiðis eru viðurskiftini nú einaferð hjá fiskimanninum, sigur Birgir Hansen.

Ellivu mans eru við Brestir. Ein sum lesur til maskinmeistara er við í starvsvenjing. 

Sjómanstrúboðarin vitjaði umborð og heilsaði uppá manningina.

Teimum og sjófólkinum annars verður ynskt Guds signing og varðveitslu.

Meira frá Sjómansmissiónini her

placeholder

Vinarliga broyt tínar kennifíla - og privatlívsstillingar fyri at síggja hetta innihald

placeholder