Innanlands

Línuskipari: Fantastiskur endi á árinum

Stúgvandi fult skip

2018-12-10 12:47 Author image
Kiran Jóanesarson

Línuskipið Ågot kom í nátt inn á grynri sjógv, har teir skulu vaska skipið áðrenn teir byrja at landa í Klaksvík.

Ågot hevur verið til fiskiskap sunnanfyri Føroyar, og teir hava havt góðan fiskiskap. Skipið er stúgvandi fult av fiski.

- Vit hava gjørt 28 og eina hálva setu, og hava 170 tons, har helvtin er hýsa og hin helvtin er toskur, upplýsir Hjaltur Poulsen, skipari.

- Hetta var ein fantastiskur endi á árinum, sigur skiparin.

Túrurin var tann síðsti í hesum árinum, og tá teir hava landað, skal okkurt smávegis arbeiði gerast við skipið áðrenn farið verður í gongd við fiskiskapin í 2019.