Nýggjasta skipið í grønlendska flotanum ávegis til Føroyar

Nýggjasta fiskiskipið í grønlendska flotanum er ávegis til Føroyar.

Nýggja Regina C fór úr Spania, har skipið er bygt, mánadagin, og setti kós móti Føroyum.

Regina C skal bunkra í Fuglafirði, har teir vera á middegi í morgin.

Skipari umborð er Jóan Pauli Olsen úr Fuglafirði. Skiparin, sum hevur siglt í Grønlandi í fleiri ár, sigur at teir koma á Havnina eftir at teir hava bunkrað.

Eftir ætlan skuldu teir koma á Havnina leygardagin, men tað hevur gingið munandi skjótari enn vænta.

- Tá ið vit eru lidnir at bunkra skulu vit á Havnina, har vit skulu hava útgerð frá Vónini, áðrenn farið verður víðari til Grønlands.

Nýggja Regina C er ein munandi størri rækjutrolari enn undanfarna Regina C, sum varð bygd í 2002.

Skipið er knappar 80 metrar langt og heili 17 metrar breitt.

Fyrrverandi Regina C kallast í dag Merike, og hevur heimstað í Tallin. Skipið er 70 metrar langt og knappar 15 metrar breitt.