Partrolararnir Topas og Sardis verða seldir til Albania

Reiðaríið Thor í Hósvík, hevur selt partrolararnir Topas og Sardis.

- Vit bíða bara eftir teimum endaligu papírunum frá Fiskimálaráðnum, og so verða skipini endaliga strikað úr føroyska flotanum, sigur Hans Andrias Kelduberg, reiðari.

Partrolarnir eru seldir til eitt felag í Albania.

Hans Andrias Kelduberg sigur, at hetta er ein tillaging, sum verður gjørd í samband við fiskivinnuna.

- Hetta er ein tillaging, og soleiðis er tað allatíð, og tí er tað einki óvanligt í at vit selja hetta parið, sum hevur ligið seinastu tíðina í Danmark.

Trolarin Kúrberg liggur eisini í Danmark, og reiðarin upplýsir at ætlanin er eisini at selja hann, og at felagið hevur áhugaðar keyparar.