Rækjutrolarar sigla heim at landa

Trolararnir Akraberg og Gadus hava verið á rækjuveiðu seinasta túr, men fiskiskapurin hevur verið smáligur.

Akraberg hevur beint undir 620 tons, og Gadus hevur umleið 600 tons.

Báðir trolararnir fóru til fiskiskap síðst í juni, so talan hevur verið um ein drúgvan túr hjá manningunum.

Gadus skal landa sína last í Ánunum týsdagin, meðan Akraberg skal landa sína last til Bergfrost í Fuglafirði, har teir vera mikudagin.

Tá ið trolararnir hava landað, verður farið á toskaveiðu í Barentshavinum.

Gadus (Savnsmynd: Atli Hansen)