Skjótasti og besti túrur vit hava gjørt

- Hetta er sera hugaligt, samstundis sum tað er spennandi og strævið. Trolið hevur bara verið úti í 3-4 tímar hvørja ferð, hóast vanligt er 6-7 tímar. Nógvur var í hvørja ferð, og tí hava manningarnar arbeitt nógv, og hava bara fingið onkran stuttan lúr, sigur Jákup Pauli.

Í dag komu samtrolararnir Bakur og Stelkur á Runavík, har teir landa til Faroe Origin.

Øll kørini í lastunum vóru full og gott og væl tað. Hetta er sætti túrur teir gera í mai mánaði, og tað er met hjá skipunum.

Sjómanstrúboðarin tók ímóti og lagið var gott á monnum, hóast teir vóru móðir.

Tíð var bæði til prát, Guds orð, bøn og tøkk.

(Mynd: Sjómansmissiónin)

Hann fekk eisini eitt stutt prát við skipararnar, sum lótu væl at.

- Hetta er óivað skjótasti og besti túrur vit hava gjørt. Tað sigur ikki so lítið, tí eg byrjaði at fiska upsa við Skúgvi í 1978. Hendan túrin fiskað vit akkurát í tvey samdøgur og hava umleið 700 kør, sum er umleið 420.000 pund, ella 210 tons, sigur Jákup Pauli Egholm, skipari á Baki.

- Hetta er sætti túrurin hjá skipunum í mai mánaði, og tað er met. Harafturat hava vit fingið uppí allar túrarnar, og gott og væl tað, sigur hann.

-Hendan túri hava vit roynt í ein landnyrðing úr Fugloynni. Síðsta túr royndu vit vestanfyri. Hinir samtrolararnir hava roynt aðrastaðni og allir hava fingið væl av fiskið, so tað er nógvur fiskur til undir Føroyum í løtuni, sigur Jákup Pauli.

- Hvaðani er nógvi upsin brádliga komin frá?

- Tað veit eg ikki, men menn meina, at upsastovnurin er felagsstovnur fyri okkum og grannalondini. Tí kann tað verða ferðandi upsi, sum er komin inn á føroyagrunnin, tí hann er bæði stórur og feitur, og nógv er til av honum, sigur Ólavur Jacobsen, skipari á Stelki.

- Hetta er sera hugaligt, samstundis sum tað er spennandi og strævið. Trolið hevur bara verið úti í 3-4 tímar hvørja ferð, hóast vanligt er 6-7 tímar. Nógvur var í hvørja ferð, og tí hava manningarnar arbeitt nógv og hava bara fingið onkran stuttan lúr, sigur Jákup Pauli.

Teimum og sjófólkinum annars verður ynskt Guds signing og varðveitslu.