Spildurnýtt svenskt farmaskip í FAS

Svenska felagið Thunbolagen hevur bygt spildurnýtt farmaskip, sum nú er skrásett í føroysku altjóða skipaskránni, FAS, skrivar Sjóvinnustýrið á heimasíðuni.

Talan er um skipið Lidan, sum er 2.926,00 bruttotons til støddar og 85 metrar langt.

Lidan er bygt á Ferus Smit skipasmiðjuni í Westerbroek í Niðurlondum í ár.

Føroyska smápartafelagið Spf. Thun, Føroyar er skrásett sum eigari. Felagið hevur frammanundan níggju skip skrásett í Føroyum.