Verður fíggjarstjóri í stórari norskari alifyritøku

44 ára gamli føroyingurin Gunnar Nielsen er settur í starv sum fíggjarstjóri á stóru norsku alifyritøkuni SalMar ASA. Hesum boðaði norska felagið við høvuðssæti á oynni Frøya úttan fyri Tróndheim frá í tíðindaskrivi í gjár.

Seinastu árini hevur Gunnar Nielsen sitið sum fíggjar- og varastjóri í bilasøluni Reyni Service, men hann hevur eisini royndir í alivinnuni. Árini 2014 til 2019 var hann fíggjarstjóri í Bakkafrost.

Hann er útbúgvin ‘Master of Science in Business Economics and Auditing” á Copenhagen Business School.

Í SalMar skal Gunnar Nielsen avloysa Trine Sæther Romuld, ið fer í nýtt starv sum stjóri í SalMar Aker Ocean, eitt felag, ið arbeiðir við aling úti á opnum havi.

- Vit fegnast um at fáa Gunnar við á liðið sum nýggjur CFO í SalMar. Hansara royndir í alivinnuni saman við hansara hansara altjóða royndir og vitjan um strandamentan eru dygdir, ið hóska væl til okkara framtíðar vakstrarætlanir, sigur stjórin í SalMar, Gustav Witzøe í tíðindaskrivi.