Einki antibiotika ella leivdir av evnum móti laksalús í føroyskum alifiski

Einki antibiotika ella leivdir av evnum móti laksalús var ávíst í føroyskum alifiski, og nøgdirnar av tungmetalum og lívrunnum eiturevnum vóru langt undir ásett mørk. Tað skrivar Heilsufrøðiliga Starvsstovan, sum á hvørjum ári kannar, at laksur ikki inniheldur heilivágsleivdir og at innihaldi av óynsktum evnum er undir markvirðir. Samlaða tali av sýnum í 2018 var 637. Ætlandi vera umleið 600 sýnir tikin í ár.

Sýni kannað fyri tungmetal vístu lág virðir fyri kadmium, blýggj og kyksilvur (sí mynd av kyksilvur). Nøgdin av lívrunnum evnum, so sum PCB og dioksin, var eisini lágt í øllum sýnum (sí mynd av dioksin+DL-PCB). Viðvíkjandi leivdum av antibiotika í livur og vødda, so vóru øll sýni negativ.

Tá hugt var eftir, hvar laksurin verður keyptur, so er niðanfyri topp 5 keyparalond av alilaksi í 2018:

1. Russland 35%,  20.990 tons

2. EU 28%, 16.473 tons

3. USA 18%, 10.490 tons

4. Kina 16%,  9.334 tons

5. Sameindu Emirríkini 2%, 908 tons

Fyrr fór bróðurparturin til EU-lond (79% í 2008), men nú er parturin fallin til 28% í 2018.