Ingi Samuelsen
Hetlendski trolbáturin Resilient úr Whalsey fekk ein óvanligan fong tá teir trolaðu eftir havtasku í farnu viku.
Millum fiskarnar, sum spraklaðu á dekkinum, var ein havtaska, sum vá ikki minni enn 57 kilo – ei undur í, at tað í bretskum miðlum verður kallað ein ’monster monkfish’.
Skiparin á Resilient, Arthur Polson, gjørdist bilsin, tá hann sá fiskin.
- Vit hava roynt eftir havtasku í tíggju ár og ongantíð sæð eina í hesi støddini. Vit hava ofta fingið stórar havtaskur, men ongantíð nakað, sum liggur í námind av hesari, sigur skiparin við Shetnews.
Fiskurin var veiddur á eini leið 90 fjórðingar eystan fyri Lerwick.
Havtaskur kunnu gerast rættiliga stórar – upp í seks føtur til longdar, men sjáldan meira enn tað hálva av hesum, skrivar Shetnews.
Sambært British Sea Fishing, er størsta havtaska nakrantíð fingin í Noregi í 2012, men hon vigaði eisini tað dupulta av hesari.
Fyritøkan Granite City Fish í Aberdeen, keypti óvanliga fongin.
Vinarliga broyt tínar kennifíla - og privatlívsstillingar fyri at síggja hetta innihald