Høvdu brúkiligan fiskiskap, men so hvarv fiskurin brádliga

- Síðstu vikurnar hava vit gjørt tríggjar brúkiligar túrar eftir svartkjafti vestanfyri Írland. Hóast vánaligt veður, og vit royna uttanfyri 200 fjórðingar, so hevur fiskiskapurin samanumtikið verið í lagið, sigur John Leif Joensen, skipari á Bogaranum.

Í gjár landaði Borgarin 2300 tons av svartkjafti til Havsbrún í Fuglafirði.

Sjómanstrúboðarin vitjaði umborð og fekk eitt prát við skiparan John Leif Joensen. Høvi var eisini at hava eitt Guds orð og bøn, og so fingu teir geyma við kristnum sjónbandasangum.

(Mynd: Sjómansmissiónin)

Uppá fyrispurning hvussu fiskiskapurin hevur roynst, svaraði John Leif:

- Vit landa nú umleið 2300 tons av svartkjafti. Tað er ein brúkiligur túrur, hóast tað er langt at sigla á og av fiskileið.

- Síðstu vikurnar hava vit gjørt tríggjar brúkiligar túrar eftir svartkjafti vestanfyri Írland. Hóast vánaligt veður, og vit royna uttanfyri 200 fjórðingar, so hevur fiskiskapurin samanumtikið verið í lagið, sigur hann.

- Vit ynsktu okkum sjálvsagt nøkur tons afturat, men svartkjafturin hvarv brádliga. Hann stendur sera tættur í gýtingartíðini, men aftaná spjaðist hann, og tá loysir tað seg ikki at royna eftir honum, sigur John Leif.

- Nær fer skipið so avstað aftur?

- Í dag. Nú fara vit at royna eftir svartkjafti í føroyskum sjógvi. Fiskiskapurin er smáligur í løtuni, men plagar at batna tá nakrir dagar eru farnir av apríl. Tá er svartkjafturin vanliga komin norður í føroyskan sjógv. Vit koma at royna eftir svartkjafti til í summar, sigur John Leif.

Teimum umborð á Borgaranum og sjófólkinum annars verður ynskt Guds signing og varðveitslu.