Mær dámar arbeiðið og eg orki væl enn

- Eg havi siglt við Túgvusteini í átta ár. Síðstu seks árini havi eg verið við hvønn túr! Tað staðfestir Helge Ludvig uttan at reypa ella knarra.

Í morgun landaði garnaskipið Túgvusteinur 15 tons av svartkalva í Havn. Teir høvdu roynt eystur úr Fugloynni í eina lítla viku, so tað var brúkiligur fiskiskapur.

Sjómanstrúboðarin vitjaði umborð, og har hitti hann, millum aðrar, maskinmannin, Helge Ludvig.

Helge hevur siglt í 56 ár. Tí má hann sigast at vera ein av okkara garvaðu sjómonnum og maskinmonnum. 

Hann fór til skips sum 14 ára gamal og sigldi so eina tíð, áðrenn hann fór í smiðjulæru.

Útlærdur maskinsmiðjur fór hann á maskinmeistaraskúla í Havn, og hevur siglt sum maskinmaður síðani. Í septembur verður hann 75 ár.

(Mynd: Sjómansmissiónin)

Hann hevur tað gott hóast sín høga aldur, og hevur heilt nýliga endurnýggja sær heilsuváttan og trygdarskeið.

- Eg havi tað gott, feili einki og orki væl. Eg taki bara onkra tablett av og á fyri ov høgt blóðtrýst, og tað er tað, sigur góðsligi og lítillátni, Helge Ludvig.

- Um eg framhaldandi hava tað líka gott, sum eg havi tað nú, so kann eg sigla nakað afturat. Men nú fáa vit at síggja! sigur hann.

- Hevur tú nakran avloysara?

- Nei! Tað er sera bundisligt at royna við gørnum, tí tey skulu dragast við jøvnum millumbilum. Steðgirnir í Havn, har vit landa, eru so mikið stuttir, at eg tími ikki suður til Fámjin. Tí eru tað ofta fleiri mánaðir ímillum at eg eri heima, sigur Helge.

- Eg eri heima jóladagarnar, so annars bara nakrar fáar dagar um árið, um skipið liggur.

- Eg havi siglt við Túgvusteini í átta ár. Síðstu seks árini havi eg verið við hvønn túr! Tað staðfestir Helge uttan at reypa ella knarra.

Trúboðarin hevði eitt Guds orð og bøn, áðrenn hann takkaði fyri blíðskap og prát.

Teimum umborð á Túgvusteini, og sjófólkinum annars, verður ynskt Guds signing og varðveitslu.