Øll manningin á Fay bjargað

(Upptøkan omanfyri er frá norsku bjargingartænastuni)

Fyrrapartin kom neyðarkall frá norska línu- og garnaskipinum Fay. Skipið hevði fingið ógvuliga slagsíðu 75 kilometrar úr landi í Barentshavinum, skrivar vg.no.

Fyrst varð sagt at 13 mans vóru umborð, men meðan bjargingarátakið var í gongd gjørdist greitt, at talan var um 12 mans.

Fay (Mynd: Stadyard)

Tá neyðarkallið kom, var báturin farin at søkka, og manningin upplýsti, at teir vóru ávegis í bjargingarbátarnar.

Ein Sea King-tyrla varð send úr Banak, og var frammi um middagsleitið lokala tíð. Tyrlan heysaði allar menninar upp.

Veðrið var sera vánaligt á leiðini. Vindstyrkin var upp í 20 metrar um sekundið, og tað vóru høgar aldur.

Báturin er bara eitt ára gamal, og varð doyptur í Kristianssund í 2018. Fay er 21 metrar langur og 10 metrar breiður. Enn er ógreitt hví báturin fekk slagsíðu.

Føroyingar hava eisini siglt við Fay.