Poul Michelsen hitti russiska fiski- og alimálaráðharran

Poul Michelsen, landsstýrismaður, vitjaði í gjár fiskiveiðustovnin í Moskva, har hann hitti russiska fiski- og alimálaráðharran, Ilya Shestakov, á stuttum kurteisisfundi.

Á fundinum umrøddu teir báðir samstarvið millum Russland og Føroyar, umframt at kunna hvønn annan um aktuell politisk mál, m.a. um felagsnevndarfundin við EABS, skrivar Uttanríkis- og vinnumálaráðið.

Felagsnevndarfundur við Evrasiatisku Búskskaparsamgonguna er í hesum døgum í Moskva. Fyrsti fundurin var í gjár.

Nevndin er sett á stovn sambært semjuskjalinum millum partarnar, sum var undirskrivað í Føroyum í august í fjør.

Poul Michelsen, landsstýrismaður, stóð á odda fyri føroysku sendinevndini, og Tatiana Valovaya, EABS ráðharri í búskaparmálum fyri EABS sendinevndini.

Felagsnevndin hevur til endamáls at virka fyri at styrkja samstarvið millum Føroyar og limalondini í EABS.

Russland, Hvítarussland, Kasakstan, Kirgisia og Armenia eru limir í EABS, sum er ein felags búskaparsamgonga.