Svartkjaftur og botnfiskur landaður í Fuglafirði

Uppsjóvarskipið Jupiter kom í gjár á Fuglafjørð, har teir skuldu landa.

Teir hava verið á svartkjaftaveiðu í føroyskum sjógvi, og høvdu 1300 tons av svartkjafti við til lands, sum teir landaðu til Havsbrún.

Tað er tó ikki einans uppsjóvarfiskur, sum er landaður í Fuglafirði seinastu dagarnar, tí um vikuskiftið kom Akraberg, sum er ein av barentshavstrolaranum heim aftur.

Verksmiðjutrolarin hevði 700 tons av rundfrystum botnfiski umframt 350 tons av slógvi við til lands, sum teir hava fiskað uppá góðan hálvan annan mánaða.

Akraberg hevur nú fiskað kvotuna fyri 2020.

 Akraberg - Savnsmynd (Kiran Jóanesarson)