Alda Nielsdóttir
Í tíðarskeiðnum februar 2024 til januar 2025 varð útflutt fyri 12,7 milliardir krónur, sum er 105 milliónir krónur - ella 0,8 prosent - meira enn sama tíðarskeið í undanfarna ári.
Fiskavøruútflutningur hetta tíðarskeiðið var 11,8 milliardir krónur, sum er ein vøkstur á 35,4 milliónir krónur - ella 0,3 prosent, skrivar Hagstovan.
Útflutningurin av fleiri fiskasløgum gongur fram, harundir laksur, upsi og makrelur, meðan útflutningurin av flestu øðrum fiskasløgum gongur aftur.
Útflutningurin av laksi er vaksin 527 milliónir krónur hetta tíðarskeiðið. Virðið er vaksið nærum 10 prosent, og nøgdin er vaksin góð 21 prosent.
Útflutningvirði av vørubólkinum "onnur nýtsla, ikki mannaføði" er vaksið 174,6 milliónir krónur, ella 46,5 prosent. Hetta er fyri tað mesta slógv.
Útflutningsvirði av makreli er vaksið 396 milliónir krónur, ella 38,6 prosent. Vøksturin stavar frá príshækkingum, tí nøgdin er minkað 4,7 túsund tons, ella góð fimm prosent.
Vinarliga broyt tínar kennifíla - og privatlívsstillingar fyri at síggja hetta innihald