FAS: Føroyar detta tvey pláss á Hvítalista

Paris MoU hevur júst dagført avrikslistan fyri flaggstatir, og Føroyar eru hesaferð nummar 30 á listanum. Tað er tvey pláss verri enn í fjør, tá vit vóru nummar 28.

Lægra plaseringin í ár er tó ikki orsakað av verri úrslitum hjá føroyskum skipum, skrivar Sjóvinnustýrið. Stigatalið er í veruleikanum betri hesaferð enn síðst.

Tað er lutfallið millum talið av eftirlitum og afturhaldum, sum er broytt. Eisini hava onnur lond á listanum betrað seg og hava tí fingið eina betri plasering.

Fyri at avgera plássið á listanum verður hugt eftir, hvussu ofta skip í FAS eru kannað og hildin aftur í havnastatseftirliti í Evropa seinastu trý árini. Føroysk skip eru kannað 219 ferð í hesum tíðarskeiðinum, og fýra afturhald hava verið. Í tíðarskeiðinum sum var grundarlag fyri seinasta lista, vórðu føroysk skip kannaði 240 ferð, og somuleiðis vóru fýra afturhald. Tað eru 72 skip í FAS.

FAS hevur verið á Hvítalista fyri flaggstatir síðani 2011. Í hesum tíðarskeiði hava vit flutt okkum millum 26. pláss og 39. pláss.

Á hvørjum ári hevur Sjóvinnustýrið átakið “Ársins Skip”, sum skal eggja reiðaríium og manningum í FAS til at fyribyrgja afturhaldi. Skipið við fæst feilum og eftirlitum verður lønt við einum heiðursbrævi, og Sjóvinnustýrið kunnger vinnaran í miðlunum. Reiðarí og manningar hava tikið væl ímóti hesum átaki, og tað er okkara greiða fatan, at hetta átakið er við til at betra um góðskuna umborð á føroyskt flaggaðum skipum, skrivar Sjóvinnustýrið.