Føroyski jákupsskeljafiskiskapurin MSC-góðkendur

Føroyski fiskiskapurin eftir jákupsskel er nú vorðin góðkendur av Marine Stewartship Council, MSC.

Góðkenningin er galdandi frá 1. september 2021, og tað merkir, at jákupsskeljar, ið eru fiskaðar eftir 1. september í fjør, kunnu merkjast við góðskumerkinum frá MSC.

Tað serliga við føroyska fiskiskapinum eftir jákupsskel er, at tað er bert tað eina felagið, O. C. Joensen á Oyri, sum rekur henda fiskiskap, og at fiskiskapurin er røktur við einum skipið í fleiri áratíggjur.

Í tíðindaskrivi í dag ynskir Gisli Gíslason, stjóri verkætlanarstjóri fyri MSC í Norðurhøvum, føroyingum og serliga FISF (Faroe Islands Sustainable Fisheries) til lukku við góðkenningini.

- Hesin fiskiskapurin hevur prógvað, at tey megna at halda strongu krøvini, og kunnu bjóða eina framúr góða vøru til marknaðin. O. C. Joensen hevur verið støðufast í royndini at lúka marknaðarkrøvini, sigur hann.

Durita í Grótinum, leiðari fyri Faroe Island Sustainable Fisheries sigur:

- Góðkenningin av jákupsskeljafiskiskapinum í føroyskum sjógvi er enn einn varði hjá føroyskari fiskivinnu. Vit eru á einari ferð fyri at fáa umsitingina av okkara fiskivinnu góðkenda sum burðardygg. Í fjør varð toska- og hýsufiskiskapurin í føroyskum sjógvi góðkendur, og harvið fekk okkara mest týðandi botnfkiskiskapur góðkenning.

- Tað hevur verið tíðarkrevjandi at fáa jákupsskeljafiskiskapin góðkendan, men vit eru nøgd við, at tað nú er eydnast. Havstovan hevur spælt ein týðandi leiklut í hesi tilgongdini við at fáa allar dátur til vega til tess at sannføra altjóða serfrøðingarnar, sigur Durita í Grótinum.

Hans Andrias Kelduberg, nevndarformaður í O. C. Joensen sigur soleiðis í tíðindaskrivinum:

- Vit í OCJ eru sera nøgd við viðurkenningina. Vit hava virkað í hesi vinnuni í fleiri áratíggjur og avmarka fiskiskapin til bert eitt far í avmarkaða tíð av árinum, júst fyri at varðveita lívmegnið – biomassan – av jákupsskel og verja vistskipanina har fiskiskapurin fer fram. MSC-góðkenningin av fiskiskapinum hevur stóran týdning fyri okkara kundar, tí teir harvið fáa prógv fyri, at altjóða serfrøðin hevur kannað okkara fiskiskap.