Føroysku skipini effektivari enn norsk og íslendsk í august og oktober

(Makrelfiskiskapurin 2022. Video: Fishfacts)

Fishfacts hevur skrivað og givið út greiningina, “Mackerel Season 2022”, har
farið verður í dýpdina við norska, íslendska og føroyska fiskiskapinum eftir
makreli í 2022.

Hugt verður millum annað eftir:
• Hvat miðalveiðan er per skip
• Hvør fiskar mest effektivt: Føroyar, Norra ella Ísland
• Hvar makrelurin verður fiskaður
• Oljunýtslan hjá føroysku skipunum í miðal samanborið við norsku og íslendsku skipini
• Hvør hevur lægsta Co2-útlátið fyri hvørt fiskað kilo av makreli
• Aðrar greiningar

Við effektiviteti meinast veiðuúrtøkan fyri hvørja siglda sjómíl. Greiningin vísir millum annað, at føroysku skipini vóru mest effektiv í oktober. Tá fiskaðu føroysku skipini í miðal 1,1 tons av makreli fyri hvørja siglda sjómíl.

Næsthægsta úrtøkan var í august, tá fingu skipini í miðal eitt tons av makreli fyri hvørja siglda sjómíl.

Hesar báðar mánaðirnar vóru tey føroysku skipini eisini tey mest effektivu samanborið við tey norsku og tey íslendsku skipini.

Big data, algoritmur og maskinlæra
Greiningin byggir á AIS-dátur, algoritmur og maskinlæru. Veiðuhagtølini eru fingin til vega frá myndugleikunum.

- Vit hava meira enn 6.000 fiskiskip í skipanini, og hvørt tað einasta fiskiskip er knýtt at okkara egnað fylgisveinakervi. Fyri hvønn minutt, sum gongur, framleiða vit dátur um ferð, vind, ferðamynstur og annað, og tað merkir, at vit ein vanligan dag framleiða meira enn átta milliónir dátur – ella meira enn tríggjar milliardir dátur um árið, og tað er ikki einki, sigur Hanus Samró, medeigari í Fishfacts.

Sjónbandið omanfyri vísir fiskiskapin eftir makreli hjá niðanfyrinevndu skipum í
tíðarskeiðinum 3. august 2022 til 3. september 2022:

1. Finnur Fríði (FO)
2. Christian í Grótinum (FO)
3. Slaatterøy (NO)
4. Gerda Marie (NO)
5. Børkur (IS)
6. Vilhelm Thorsteinsson (IS)

Fiskiskipini eru tilvildarliga vald. Tey endurspegla ikki greiningina á nakran hátt, men sjónbandið vísir greitt, hvussu tú við søguligum AIS-dátum kanst endurskapa og endurspæla slóðirnar og ferðamynstrini hjá føroysku, norsku og íslendsku fiskiskipunum.

Fiskiskapur eftir makreli - september 2022 - norsk, føroysk og íslendsk fiskiskip

Metoda. Vit hava sett "Geo-fence" (hegnað økið inni) og greinað makrelfiskiskapin innanfyri økini.

Frá vinstru. Hanus Samró, medeigari, og Óli Samró, stjóri og stovnari av Fishfacts