Nýggi Vesturvarði skrásettur í Føroyum

Fyri tveimum vikum síðani skrivaðu vit, at vágamenn høvdu keypt ísfiskatrolaran Aalskere úr Orknoyggjunum.

Nú er skipið yvirtikið og skrásett í føroyska flotanum. Tað framgongur í yvirlitinum hjá Skipaskrásetingini.

Skipið hevur fingið navnið Vesturvarði, og tað er P/F Suðringur við Tummasi Henriksen á odda, sum er nýggjur eigari.

Talan er um eitt nýtt og framkomið skip, sum vágamenn hava fingið fatur á. Nýggi Vesturvarði er bygdur í Danmark í 2020.

Ísfiskatrolarin er 35 metrar langur og 10,5 metrar breiður.

Vesturvarði liggur í løtuni í Thyborøn.