Vóru eftir gervunum

Hósdagin og fríggjadagin í farnu viku, lá íslandska pelagiska skipið Guðrún Þorkelsdóttir, av Eskifirði á Runavík. Teir fóru avstað aftur leygarmorgunin. 

- Í desembur vóru vit í Føroyum og lótu KJ Hydraulik, á Kambsdali, gervuni (gearini) á trolspølunum. Teir skuldu yvirhála tey og so seta tey uppá aftur fyrst í januar, tá skipið skuldi á svartkjaftaveiðu í føroyskum sjógvi. Tí liggja vit nú á Runavík. 

Tað segði skiparin Bjarni Már Hafsteinsson.

(Mynd: Sjómansmissiónin)

- Vit gleða okkum at sleppa aftur til fiskiskap, tí vit hava ligið síðani fyrst í oktober, tá kvoturnar vóru uppi. Árið í fjør var brúkiligt og tað vóna vit eisini fyri hetta nýggja árið, segði hann.

10 mans vóru við skipinum, men tá teir fiska við nót eru teir 13. Teir landa fyri tað mesta til verksmiðjuna Eskju, á Eskifirði, sum eigur skipið.

Sjómanstrúboðarin vitjaði umborð og heilsaði uppá manningina. Bøn var eisini biðin og teir fingu føroysku heilsaninna: -Góðan túr og Jesus fylgi tykkum!

Teimum og sjófólkinum annars verður ynskt Guds signing og varðveitslu.