Minni av makreli í Norðurhøvum

Makrelkanningarnar í juli vístu, at minni av makreli er í Norðurhøvum enn undanfarin ár. Tað skrivar Havstovan á heimasíðuni.

Vísitalið er tað minsta síðani 2007. Samanborið við í fjør er minkingin umleið 40 prosent. Mest var av trý og fýra ára gomlum makreli norðanfyri, men eisini var nógv av eitt og tvey ára gomlum makreli í Norðsjónum.

Makrelurin er framvegis rættiliga eystarliga, og tað hevur hann verið síðani 2018, tá nøgdirnar byrjaðu at minka í Eysturgrønlandi. Serliga var nógvur makrelur úti á djúpum, uttan fyri norska landgrunnin. Nøgdirnar norðan fyri Føroyar vóru nakað tær somu sum í fjør.

Úrslitini verða brúkt í makrelstovnsmetingini, sum verður gjørd komandi vikuna. Makrelkanningarnar eru felagskanningar, sum Jákup Sverri ger saman við rannsóknarskipum úr Íslandi, Noregi og Danmark.

Í ár vóru úrslitini fyri sild og svartkjaft ikki tøk til stovnsmetingarfundin, men verða roknaði seinni í heyst. 

Les frágreiðingina her.